Justinianische Pest

Bi dr so genannte Justinianische Pest handlet es sich um e Pandemii, wo zur Zit vom oströmische Kaiser Justinian I. (527–565) usbroche isch, und noch Schetzige bis zu 25 Millione Lüt umbrocht het.^[1] Si het 541 in Egüpte aagfange, isch 542 z Konstantinopel aachoo und het sich bald im ganze Middelmeerruum verbräitet. Si gältet as die grössti Pandemii im antike Öiropa und es isch mööglig, ass si zum Misserfolg vo dr Restauratio imperii vom Justinian bidräit het. Si isch woorschiinlig us Afrika südlig vo dr Sahara oder Indie iigschleppt worde und isch im Norde bis zum Rhii cho, im Oste bis uf Persie. Bis zum Joor 770 isch si öbbe alli zwölf Joor wider usbroche.

Dank dr Darstellig vo de Chrankhäitssümptom im Wärk vom zitgenössische spootantike Historiker Prokopius vo Caesarea (Prokop, Kriege 2, 22 ff.) und vom Euagrios Scholastikos, wo sälber chrank worde isch, und dank DNA-Undersuechige vom ene Massegraab bi Sens isch s zimlig unumstritte, ass d Pandemii vom Pesterreger (Yersinia pestis) usglööst worde isch.^[2]

1. ↑ Rosen, William (2007), Justinian's Flea: Plague, Empire, and the Birth of Europe. Viking Adult; pg 3; ISBN 978-0-670-03855-8.
2. ↑ Kirsten I. Bos et al.: «Yersinia pestis: New Evidence for an Old Infection», (Memento vom 14. Dezämber 2013 im Internet Archive) in Plos|One , veröffentligt am 28. Novämber, 2012]